Հայկական միջազգային առաջին լուսանկարչական փառատոնի շրջանակներում Արգենտինայի դեսպանության գործերի ժամանակավոր հավատարմատար Միգել Արթին Չիլինգիրյանը Երևանում ընդունեց լուսանկարիչ, լուսանկարչության պատմագետ և Լատինական Ամերիկայում դագերոտիպիայի ամենանշանավոր կոլեկցիոներներից մեկը հանդիսացող Կառլոս Գաբրիել Վերթանեսսյանին, որը 20 այլ երկրներից ժամանած հեղինակավոր լուսանկարիչների հետ միասին փառատոնի պատվավոր հյուրերից է:
Արգենտինայի Արտգործ նախարարությունը Կառլոս Վերթանեսսյանին միջազգային այս փառատոնին իր մասնակցության համար շնորհել է Մշակութային հետաքրքրվածության վկայագիր:
Այս այցի ընթացքում, Վերթանեսսյանը, Գործերի ժամանակավոր հավատարմատարի հետ միասին, հանդիպումներ ունեցավ Հայաստանի Պատմության թանգարանի տնօրեն Գրիգոր Գրիգորյանի, Մաշտոցի անվան հին ձեռագրերի ինստիտուտ Մատենադարանի տնօրեն Վահան Տեր-Ղևոնդյանի, նույն թանգարանի Գլխավոր ավանդապահ Գևորգ Տեր-Վարդանյանի, ինչպես նաև Էջմիածնի թանգարանի տնօրեն, Հայր Ասողիկ Կարապետյանի հետ:
Զրուցակիցները խոսեցին համապատասխան ինստիտուտների գործունեությունից, ինչպես նաև փորձի փոխանակման ու համագործակցության հնարավորություններից: Վերթանեսսյանը Մատենադարանին և Էջմիածնի թանգարաններին նվիրեց իր «El retrato imposible» («Անհնարին դիմանկարը») գիրքը և իր տեսակի մեջ եզակի դագերոտիպի կրկնօրինակ, որը պատկերում է հայ Սերովբե Ալիշանին: Այն նաև դրամագիտության կոլեկցիոներներին հայտնի ամենահին դագերոտիպներից է:
