Այսօր Արգենտինայի Հանրապետության դեսպան Մարիանո Վերգարան հանդիպում է ունեցել Հայաստանի Հանրապետության վարչապետ Նիկոլ Փաշինյանի հետ։ Հանդիպումը հիանալի հնարավորություն էր վերանայելու Հայաստանի և Արգենտինայի սերտ հարաբերությունները և քննարկելու փոխադարձ հետաքրքրություն ներկայացնող տարբեր հարցեր։
Այս շրջանակներում քննարկվել են երկկողմ օրակարգի տարբեր հարցեր՝ ի թիվս այլոց՝ տնտեսական, քաղաքական, մշակութային և կրթական համագործակցության ոլորտներում։ Զրուցակիցներն անդրադարձել են նաև տարածաշրջանային ներկայիս քաղաքականությանը և Մալվինյան հիմնախնդրին։
Հատուկ անդրադարձ է կատարվել արգենտինահայ համայնքի կողմից Արգենտինայում մշտապես իրականացվող համերաշխության ակցիաներին և համագործակցության ծրագրերին, որոնց խթանում են մեր երկրը և քաղաքացիները շուրջ 30 տարի՝ երկկողմ քաղաքական հարաբերությունների հաստատումից ի վեր: Համերաշխությունը եղել է մեր հարաբերությունների հիմնական հավաստիքը:
Վարչապետ Փաշինյանը հետաքրքրվել է Արգենտինայի Առևտրի պալատի գործարկումով՝ կարևորելով այդ նախաձեռնության արդիականությունը, որը միտված է ամրապնդել երկու երկրների միջև առևտրային կապերը։ Դեսպան Վերգարան նշեց, որ նախաձեռնությունն ունի Հայաստանի էկոնոմիկայի նախարարության աջակցությունը։
Հայաստանի և Արգենտինայի միջև դիվանագիտական հարաբերությունների հաստատման 30 ամյակի շրջանակներում, դեսպան Վերգարան անդրադարձել է հոկտեմբերի վերջին Երևանի ֆիլհարմոնիկ նվագախմբի հետ համատեղ կայանալիք արգենտինական երաժշտության համերգին, ինչպես նաև Հայաստանի Պետական Կոնսերվատորիայում «Բանդոնեոնի մշտական ամբիոն» ստեղծելու նախագծին, որը աննախադեպ իրադարձություն կլինի հանրապետությունում և տարածաշրջանում:
Թե՛ դեսպան Վերգարան և թե՛ վարչապետ Նիկոլ Փաշինյանը վավերացրել են Արգենտինայի և Հայաստանի միջև հարաբերությունների ամրապնդումը շարունակելու հանձնառությունը՝ հիմնված ընդհանուր արժեքների և եղբայրության կապերի վրա, որոնք միավորում են մեր հասարակությունները։
